Twee vas vir besit van onwettige ammunisie
2010-08-22 12:39
Johannesburg - Twee mans is in die Ngqeleni-gebied in die Oos-Kaap in hegtenis geneem vir die besit van onwettige ammunisie en vuurwapens.
"'n Sestigjarige voormalige lid van die Transkei Verdedigingsmag en 'n twintigjarige man is Saterdagaand in hegtenis geneem," het polisiewoordvoerder Kol. Mzukisi Fatyela gesê.
Die mans het na bewering 22 skote ammunisie vir 'n .38-rewolwer, 18 leë magasyne en 16 skote ammunisie vir 'n R5-geweer en een handgranaat in hul besit gehad.
Die polisie het die mans se huis deursoek as deel van Operasie Gijima Tsotsi wat op misdade soos huis- en besigheidsinbrake en kapings fokus.
Die mans sal Maandag in die Ngqeleni magistraatshof verskyn.