Twee vas vir R2 miljoen se dwelms
2011-07-10 20:14
Johannesburg – Meer as R2 miljoen se dwelms en vervaardigingstoerusting is Sondag ontdek tydens ‘n klopjag in Pretoria, waarna twee Nigeriese mans in hegtenis geneem is, het die polisie in Gauteng gesê.
Die polisie het ‘n klopjag op ‘n huis in Waterkloof uitgevoer ná ‘n ondersoek wat meer as ‘n maand geduur het. Hulle het op die mans afgekom terwyl hulle dwelms vervaardig het, het lt. kol. Lungelo Dlamini gesê.
Verskeie chemikalieë, skale en bottels wat vir die vervaardiging van Tik gebruik is, is by die dubbelverdiepinghuis ontdek, het hy gesê.
Nadat die mans ondervra is, het hulle die polisie na ‘n luukse huis in Monument Park geneem, waar nog dwelms in die motorhuis, kombuis en woonkamer gevind is. Toerusting vir die vervaardiging van dwelms is ook op dié perseel gevind.
Volgens Dlamini is dié huis vermoedelik as ‘n verspreidingspunt gebruik.
Beslag is op ‘n Opel Corsa-bakkie en ‘n BMW X5 gelê by die eerste huis.
Die mans sal na verwagting Dinsdag in die Pretoria-landdroshof verskyn op aanklagte van die vervaardiging van dwelms.
- Volg Nuus24 op Twitter
- SAPA