Twee vas ná rowers Pta-man in maag skiet
2012-01-16 09:18
Johannesburg – Twee mans is Vrydag in Delmas gearresteer nadat rowers ’n Pretoriase man vroegoggend in die maag geskiet het.
Ao. Duane Lightfoot, polisiewoordvoerder, het gesê drie rowers het omstreeks 01:00 deur ’n gebreekte venster by een van die wooneenhede in die Wisteria-kompleks in Moreletapark ingeklim.
“Dit lyk of een van hulle uit skok ’n skoot afgevuur het toe hulle die 33-jarige man, wat alleen in die kompleks bly, gewaar het.”
Die man het wakker geskrik en opgestaan toe die rowers sy kamerlig aanskakel.
Die rowers het met ’n skootrekenaar en selfoon gevlug.
Volgens Lightfoot is twee moontlike verdagtes wat iets in die 20 is ure ná die voorval in Delmas gearresteer.
Die gewonde man is in ’n bestendige toestand in die Unitas-hospitaal in Centurion.
Volg Nuus24 op Twitter
- Beeld