Twee vas ná hulle brandstof steel
2010-02-18 20:34
Johannesburg – Die eienaar van ‘n Oos-Kaapse busmaatskappy en die bestuurder van ‘n dieseltenkwa is in hegtenis geneem nadat hulle glo brandstof gesteel het.
Die verdagtes het aan die polisie gesê dat 'n tenkwa vol diesel glo vroeër gekaap is.
Volgens supt. Mzukisi Fatyela, polisiewoordvoerder, het die bestuurder van die tenkwa Dinsdagaand beweer dat hy in Tsolo, naby Mthatha, gekaap is en dat sy beursie en selfoon gesteel is.
Ondersoekbeamptes het die tenkwa later in Libode opgespoor.
Die voertuig was van Port Elizabeth na Durban onderweg met 37 000 liter brandstof, maar toe die polisie dit opgespoor het was dit leeg.
Die tenkwa was toegerus met ‘n opsporingstoestel en beamptes het die bestuurder se reis nagegaan.
Dit het hulle gelei na die hoofkwartier van ‘n busmaatskappy in Mthatha, wat ‘n kringtelevisiestelsel in werking gehad het.
Volgens Fatyela het die beeldmateriaal glo gewys hoe die bestuurder van die tenkwa die brandstof in die depot se ondergrondse brandstoftenks ingooi.
Hy is glo ook ‘n onbekende hoeveelheid geld betaal.
Polisie het die bestuurder van die tenkwa, sowel as die eienaar van die busmaatskappy in hegtenis geneem, maar hulle is steeds op die uitkyk vir ‘n derde persoon wat hulle vermoed ook betrokke was.
Die twee sal Donderdag in Mthatha in die hof verskyn.
- Sapa