Twee vas ná bejaarde ure lank gemartel is
2010-06-28 07:15
Beeld
Koppies. – In meer as vyf uur van marteling is ’n bejaarde van Koppies met ’n mes in sy gesig gekerf, herhaaldelik met ’n ysterstaaf geslaan, op sy knieë rondgesleep en met ’n elektriese kabel geskok.
Danksy die Koppies-polisie se flinke optrede het Tobie Loubser (83), ’n ouddirekteur van Senwes, dié aanslag oorleef.
Loubser het Sondagmiddag gesê kapt. Lukie Nel, adj. Stoffel Delport en ene adj. Pitso “moet by die naam bedank word”.
Die marteling het van Vrydag 17:00 tot omstreeks middernag by Loubser se huis op die dorp plaasgevind.
Twee boewe het na bewering voor sy motorhuis in sy voertuig op hom toegesak en hom hardhandig uit die bakkie gepluk.
Daarna is hy met ’n piksteel op die bene geslaan, asook met ’n ronde ysterstaaf op sy een arm. Die mans het hom glo vasgebind en in ’n stadium gewurg.
“Hulle het gesê hulle soek geld – nie ‘kleingeld’ nie.”
Loubser het net R870 by hom gehad, maar die aanvallers het meer gesoek.
“Hulle wou toe weet waar my kluis is.” In die kluis was nie geld nie, maar net drie vuurwapens. Hulle het toe een rewolwer gevat.
Daarna het die verdagtes die huis begin deursoek. Hulle het gedurende die soektog twee bottels drank leeg gedrink en wors gebraai.
Een man het later Loubser se keel met ’n stomp mes probeer afsny, waarna hy op sy knieë na sy slaapkamer gesleep is. Hulle het hom ook met die elektriese kabel van ’n verwarmer op sy enkel probeer skok. Daarna is hulle met Loubser se bakkie en rewolwer weg.
Ná meer as 1½?uur van sukkel kon Loubser homself loswikkel.
Loubser vertel Delport het onraad vermoed toe hy die twee mans in die bakkie sien. Hy het hulle voorgekeer en in hegtenis geneem.
Die twee verdagtes kan al vandag in die hof verskyn.
- Beeld