Twee tienermeisies van Bloemfontein verdwyn
2011-08-20 10:13
Bloemfontein – Die familie van twee tienermeisies van Bloemfontein wat twee weke gelede spoorloos verdwyn het, is rasend van bekommernis oor waar die meisies hulle bevind.
Die bekommerde ouers vertrou steeds dat hul kinders terug huis toe sal keer.
Evodia Arends (16), ’n gr.10-leerling aan die Hoërskool Heatherdale, en Raquel Louw (19) word al sedert Vrydag 5 Augustus vermis. Hulle is wel die volgende dag vir die laaste keer by die munisipale woonstelle in Brandwag gesien.
Hul onderskeie ma’s, Bessie Smith en Koba van Rooi, het ’n begrafnis op Upington bygewoon toe familielede hulle gebel het om te sê dié twee het nie daardie Vrydagaand tuis geslaap nie.
Smith en Van Rooi het hulle na Bloemfontein gehaas en die strate ingevaar om na die twee meisies te soek.
“Ons het oral in nagklubs, woonstelblokke in die stad en selfs in Andries Pretoriusstraat sonder enige sukses na die kinders gesoek,” sê ’n hartseer Van Rooi.
Van Rooi sê hul huis wat eers vol vreugde was, is nou vol hartseer en kommer.
“Ek verlang na Raquel se vrolikheid en haar uitbundige lag,” sê die bekommerde ma.
“Ek vertrou die Here vir hul veiligheid en bid dat hulle nie seer gekry het nie.”
Smith sê sy kry bittermin slaap sedert die kinders se verdwyning.
Evodia se verdwyning is steeds vir haar ’n raaisel.
“Daar was geen tekens dat Evodia ongelukkig was nie.
“Sy was stout soos enige ander kind.”
“Voordat ek na Upington vertrek het, het ek haar gevra om ’n rekening te betaal,” sê ’n bewoë Smith.
Toe sy terugkeer van Upington, het sy die kwitansies gekry van die rekeninge wat betaal is.
“As sy wou wegloop, sou sy mos die geld vir haarself gehou het. Máár sy het nie, want sy is nie so ’n kind nie.”
Smith hoop vir die beste en vind berusting in God.
Enigiemand met inligting kan Leon Rossouw by 083 410 0900 bel, of ’n e-pos aan info@detectives.co.za stuur.
– Volg Nuus24 op Twitter.
- Volksblad