Twee sterf ná ontploffing in Durbanville

2013-02-14 09:44

Johannesburg – 'n Tweede man is dood ná 'n ontploffing by 'n fabriek in Durbanville, Kaapstad, het die stad se brandweer-en-reddingsdiens Donderdag gesê.

"Die man het oornag in die hospitaal gesterf," het Theo Layne, woordvoerder, gesê.

Die ontploffing het Woensdag tydens onderhoudswerk by die Global Gases-gebou in Contermanskloofweg plaasgevind.

'n Man is vroeër dood en ses mense is beseer. Een persoon het albei bene verloor, terwyl 'n ander een been verloor het. Hulle is per helikopter na 'n hospitaal geneem. Vier ander mense het ligte beserings opgedoen.

Die ontploffing het dele van die mure en dak verwoes.

Layne het gesê die gebou sal ondersoek word vir strukturele veiligheid.

– Volg Nuus24 op Twitter

- SAPA