Twee sterf in tromp-op-botsing buite PMB

2013-01-01 10:33

Johannesburg – Twee mense is dood en drie beseer in 'n tromp-op-botsing in Pietermaritzburg, slegs twee uur ná die nuwe jaar aangebreek het.

Paramedici het met hulle aankoms op die ongelukstoneel op Manning-straat buite Pietermaritzburg twee erg beskadigde voertuie gevind, het Derrick Banks, woordvoerder vir ER24, gesê.

"Twee van die insittendes was binne die voertuig vasgekeer en het reeds aan hulle beserings beswyk; hulle is op die toneel dood verklaar," het hy gesê.

Lewenskake is gebruik om die oorledenes uit die voertuig te verwyder.

Die drie insittendes van die ander voertuig het ernstige nek- en rugbeserings opgedoen, sowel as snyplekke en moontlike beenbreuke, het hy gesê.

Die pasiënte is op die toneel gestabiliseer en is na verskeie hospitale in die gebied geneem vir mediese behandeling.

Die polisie ondersoek die oorsaak van die ongeluk.

– Volg Nuus24 op Twitter.

- SAPA