Twee sterf in gru-botsing op N1
2012-11-28 08:18
Johannesburg – Twee mense is dood in 'n taxi-ongeluk op die N1 buite Soweto, het paramedici Woensdag gesê.
Vanessa Jackson, woordvoerder van ER24, het gesê die bestuurder het Dinsdagaand in die rigting van Lenasia gery toe die taxi teen 'n staalversperring bots.
"Dit lyk asof die taxi uit die linkerbaan na die regterbaan beweeg het, waar dit toe teen die versperring gebots en die voertuig gerol het. Die taxi het toe in die middel van die pad tot stilstand gekom."
Paramedici wat op die toneel was, het die toneel beskryf as "een van die ergstes" wat hulle nóg gesien het.
"Daar was 'n jong vrou wat gedeeltelik uit die taxi geslinger is voor die taxi oor haar gerol het," het Jackson gesê.
Dié vrou se liggaam is vergruis en sy is op die toneel dood.
'n Man is ook uit die taxi geslinger.
"Hy het noodlottige kopbeserings opgedoen. Paramedici het hom agter die taxi gevind, waar hy ook gedeeltelik onder die voertuig vasgekeer is," sê Jackson.
Twee ander mense het kritieke beserings opgedoen en is op die toneel behandel voor hulle na die Chris Hani Baragwanath-hospitaal geneem is.
Elf ander mense is vir ligte tot ernstige beserings behandel en is na verskeie hospitale in die gebied geneem.
– Volg Nuus24 op Twitter
- SAPA
