Twee sterf by Ysterman-kompetisie
2013-01-20 12:04
Kaapstad – Twee Gautengse atlete het by die Ysterman-kompetisie in Oos-Londen gesterf, berig die eNCA-nuuskanaal.
Volgens die organiseerders het die mans, 29 en 35 jaar oud, vermoedelik weens 'n hartaanval gesterf terwyl hulle geswem het.
Michael Flanagan, 'n woordvoerder van die kompetisie, het aan AlgoaFM gesê die atlete is op die toneel behandel voor hulle na die St. Dominics-hospitaal geneem is.
Albei atlete het nie reageer op gespesialiseerde mediese behandeling nie en is dood verklaar.
"Ons gebede is met die families van die twee atlete wat vanoggend (Sondag) tydens die kompetisie gesterf het. 'n Verklaring sal uitgereik word," het Ironman South Africa op sy amptelike Twitterblad gesê.
Die name van die atlete sal bekend gemaak word wanneer hul naasbestaandes in kennis gestel is.
Atlete wat aan die kompetisie deelneem, moet ’n swemtog van 3,8 km, ’n fietsroete van 180,2 km en ’n drafroete van 42,2 km in uitmergelende toestande voltooi
– Volg Nuus24 op Twitter
