Twee soek borgtog in 'Sataniese ritueel'-verhoor
2011-11-16 17:28
Johannesburg – Twee van vyf jeugdiges wat daarvan beskuldig word dat hulle twee meisies in ‘n sataniese ritueel aan die brand gesteek het, het Woensdag aansoek om borgtog gedoen in die Johannesburgse landdroshof.
Die aansoek van Lester Moody (18) en Jeremy King (18) duur voort.
Die borgaansoek van die ander drie beskuldigdes, Lindon Wagner (21), Robin Harwood (18) en Harvey Isha (23) sal Vrydag aangehoor word.
Wagner en Harwood het sielkundige evaluering versoek. Isha was nie gereed om om borgtog aansoek te doen nie.
Die drie word by die Johannesburg-gevangenis aangehou tot hul volgende verskyning.
Kirsty Theologo (18) en haar 14-jarige vriendin is met petrol gegooi en aan die brand gesteek op die aand van 21 Oktober.
Die aanklagte teen die vyf mans is na moord en poging tot moord verander nadat Theologo, wat in ‘n koma was, ‘n week later in die Chris Hani Baragwanath-hospitaal gesterf het weens 75% brandwonde oor haar bolyf.
Wagner, Harwood, Moody en King het hulself aan die polisie oorhandig en die eerste keer op 25 Oktober in die hof verskyn.
Isha is by die lys van beskuldigdes gevoeg toe hy ‘n paar dae later in hegtenis geneem is.
‘n Sesde beskuldigde, ‘n 16-jarige meisie, is op dieselfde dag as Isha in hegtenis geneem en sal binne die volgende twee weke in ‘n ander hof verskyn, aangesien sy minderjarig is.
- Volg Nuus24 op Twitter
- SAPA