Twee sit lewenslank ná moord op polisieman

2012-05-15 12:00

Johannesburg – Die moordenaars van lt.kol. Mark Ishlove is tot lewenslange tronkstraf gevonnis, het The Star Dinsdag berig.

Ishlove (60) is op 15 Junie 2011 in ‘n skietery tussen die polisie en vyf mans naby ‘n laerskool in Northcliff, Johannesburg, dood. Twee van die gewapende mans is ook dood.

Die drie wat die aanval oorleef het, is Maandag deur die hooggeregshof in Johannesburg tot lewenslange tronkstraf gevonnis vir sy moord.

“Die hof is tevrede dat die minimum voorgeskrewe vonnis nie onregverdig sal wees nie,” het regter Narem Pandya gesê.

Happy Mokorongo, Mountain Msezane en Joseph Mogashoa is ook tot 16 jaar tronkstraf gevonnis vir vier aanklagte van poging tot moord en ‘n bykomende vyf jaar vir poging tot moord op ao. Selby Sibanyoni, wat gewond is.

Mokorongo is ‘n bykomende vyf jaar tronkstraf opgelê vir die besit van ‘n semi-outomatiese vuurwapen.

Al drie is nog 15 jaar opgelê vir die onwettige besit van ander vuurwapens wat in die skietery gebruik is en nóg een jaar vir die besit van ammunisie.  Die vonnisse sal saam uitgedien word.

Hulle is vrygespreek van die moord op hul medepligtige wat in die skietery dood is.

– Volg Nuus24 op Twitter
 

- SAPA