Twee sit 10 jaar ná hul priester beroof
2012-08-15 12:30
Johannesburg – Twee van die mans wat die vermoorde priester van Diepsloot, vader Louis Blondel, beroof het, is elk tot 10 jaar tronkstraf gevonnis deur die hooggeregshof in Pretoria, het The Star Dinsdag berig.
Kgaugelo Manzini en Freddy Mahlangu is gevonnis vir huisbraak met die doel om te roof, strafbare manslag en die onwettige besit van ammunisie en ‘n vuurwapen.
Twee ander mans wat van dieselfde misdade beskuldig word, Thembalethu Sindane en Jabu Ndebele, is tot agt jaar tronkstraf elk gevonnis, het die koerant berig.
Drie van die mans het erken dat hulle in die Rooms Katolieke pastorie was op die aand in Desember 2009 waarop die 70-jarige Blondel doodgeskiet is. Nietemin ontken hulle dat hulle enigiets met die moord te doen het.
Hulle was glo op soek na ‘n rekenaar en geld.
Sindane beweer hy was nie op die toneel nie, maar dat hy later ingestem het om ‘n rekenaar namens die ander weg te steek.
Volgens die koerant het regter Natvarial Ranchod Sindane se bewerings van onskuld verwerp en beskryf hom as ‘n patetiese getuie.
Hy het beslis dat die vier moes kon voorsien dat iemand tydens die rooftog kon doodgaan.
‘n Vyfde persoon, Nelson Malope, het skuldig gepleit op die moord en is verlede jaar tot 18 jaar tronkstraf gevonnis.
Hy het vir die staat getuig in die verhoor van die ander vier mans.
– Volg Nuus24 op Twitter
- SAPA
