Twee renosterbulle in Mpumalanga afgemaai
2011-11-07 09:07
Nelspruit - Nog twee renosters is die naweek in Mpumalanga naby Hectorspruit doodgeskiet, maar net ’n stuk van een se horing is afgesaag.
Die twee volwasse witrenosterbulle is eergisteraand op die plaas Mauricedale van John Hume met ’n swaarkaliber jaggeweer afgemaai.
Die vorige aand het twee vermeende renosterstropers wat vroeër die week in die Krugerwildtuin in hegtenis geneem is, saam met nog twee mans uit die polisieselle in Skukuza ontsnap deur ’n venster oop te breek. ’n Vyfde man wat saam met hulle aangehou is, het in die selle agtergebly.
Volksblad verneem van ’n betroubare bron wat nou by die ondersoeke na renosterstropery in Mpumalanga betrokke is, daar word gekyk na ’n moontlike verband tussen die ontsnapping en die jongste voorval.
Veldwagters van Mauricedale het glo Saterdagaand vroeg skote op die plaas hoor klap. Hulle het onmiddellik begin soek in die rigting waaruit die skote gehoor is.
Die vermoede is dat die veldwagters daar aangekom het voordat die stropers die tweede renoster se horings kon afsaag.
Die twee bulle, wat na raming sewe jaar oud is, se karkasse het sowat 250 m van mekaar gelê.
– Volg Nuus24 op Twitter
- Volksblad