Twee geskiet wat Zim-grens onwettig probeer oorsteek

2012-04-20 19:07

Johannesburg – Twee mans is geskiet en beseer toe hulle probeer het om die grens onwettig oor te steek, het die polisie in Musina Vrydag gesê.

Volgens lt.kol. Ronel Otto het die polisie Donderdag  omstreeks 19:00 ‘n wenk ontvang oor ‘n voertuig wat probeer om die grens van Suid-Afrika na Zimbabwe oor te steek.

“Die [mense in die motor] het begin skiet toe die polisie hulle genader het; die polisie het gevolglik teruggeskiet.”

‘n Zimbabwiese man (39) is in die been geskiet, terwyl ‘n onbekende hoeveelheid mense van die toneel gevlug het.

Polisielede wat op patrollie was, het later ‘n 29-jarige Malawiese man gevind wat langs die pad gekruip het. Hy was ook in die been geskiet. Beide is in die hospitaal onder polisiebewaring.

– Volg Nuus24 op Twitter

 

- SAPA