Twee doodgeskiet wat KFC beroof
2011-11-12 15:30
Johannesburg – Twee rowers is doodgeskiet en twee ander gewond in 'n skietgeveg met die polisie nadat hulle die KFC in Florida aan die Wesrand beroof het.
Die vier mans het Vrydagaand die werkers by die winkel met vuurwapens aangehou en later met 'n onbekende bedrag geld gevlug, het die SABC berig.
Die polisiebeamptes wat op die noodoproep reageer het het die rowers se voertuig in Main Reefweg gesien en die motor agternagesit. Die mans het toe op die polisie losgebrand, waarna die polisie teruggevuur het.
"Twee verdagtes is doodgeskiet en twee ander is ernstig gewond. Hulle is onder polisiebewaking in die hospitaal," het lt. kol. Katlego Mogale.
Sy het gesê die gesteelde geld sowel as twee ongelisensieerde vuurwapens is gevind.
Die oorlewende mans sal teregstaan op aanklagte van poging tot moord, die besit van ongelisensieerde vuurwapens en gewapende roof.
– Volg Nuus24 op Twitter
- SAPA