Twee brand toe silinder vlam vat
2010-07-23 16:14
Bloemfontein – Twee persone het ernstige brandwonde opgedoen toe ‘n suurstofsilinder waarmee hulle gewerk het, aan die brandgeslaan het.
“Na bewering het die twee in Bloemfontein aan die silinder gewerk toe daar skielik vlamme uitgekom het,” het Vanessa Jackson, ER24-woordvoorder, Vrydag gesê.
Die mans het brandwonde aan hul gesigte opgedoen.
“Met paramedici se aankoms op die toneel was die slagoffers in erge pyn. Hulle is dadelik medikasie verskaf om die pyn te verlig alvorens hul na die Bloemfonteinse Medi Clinic vervoer is,” het Jackson gesê.
Die oorsaak van die brand is nog nie bekend nie. Niemand anders is beseer nie en die brand het geen skade aan die eiendom aangerig nie.
Volg Nuus24 op Twitter.
- SAPA