Twee beseer in ontploffing by fabriek
2011-03-09 19:00
Alberton – Twee werkers is Woensdag ernstig beseer tydens ‘n ontploffing by ‘n fabriek in Alrode, het paramedici in Gauteng gesê.
Volgens Jeffrey Wicks, Netcare 911-woordvoerder, is die twee mans in ‘n ernstige maar stabiele toestand in die Milpark-hospitaal.
"Hulle het erge brandwonde aan hulle arms, bene en bolywe opgedoen," het Wicks gesê.
Na bewering was die mans besig om ‘n hoekslyper te gebruik toe daar ‘n ontploffing was.
Die presiese oorsaak van die ontploffing is nog nie bekend nie.
Een van die mans is per helikopter na die hospitaal geneem.
-Volg Nuus24 op Twitter.
- SAPA