Twee Cope-LP’s uit huise geskop
2009-09-10 06:52
Rozanne Els
Kaapstad. – Ná meer as ’n dag en ’n half van samesprekings is ’n ooreenkoms bereik tussen die departement van openbare werke en twee Cope-LP’s wat volstrek geweier het om uit hul vorige parlementêre huise te trek.
Dennis Bloem en biskop Lekoba Tolo sal nou ingevolge ’n bevel van die Wes-Kaapse hooggeregshof uit die huise in Pelican Park trek. Dié huise is intussen aan me. Winnie Madikizela-Mandela en dr. Manto Tshabalala-Msimang van die ANC toegeken.
Bloem en Tolo het aanvanklik geweier om uit die huise te trek wat sowat ’n dekade gelede aan hulle toegeken is toe hulle ANC-LP’s was.
Die departement het vroeër vanjaar om ’n uitsettingsbevel aansoek gedoen.
Kragtens die bevel deur regter Patricia Goliath moet Bloem van die vierslaapkamerhuis in Pelican Park na ’n drieslaapkamerhuis trek.
Tolo sal in Akasiapark gehuisves word totdat nog ’n drieslaapkamerhuis in Pelican Park beskikbaar word.
Ingevolge die bevel moet ’n oudit van die toekenning van huise in die drie parlementêre dorpe in Kaapstad ook gedoen word. Dit sal ’n ontleding van die gehalte en grootte van die huise wat aan elke politieke party in die dorpe toegeken is, insluit.
- Die Burger