Twee Chinese vas vir perlemoen, omkopery

2012-11-10 10:03

Johannesburg – Twee mans is Vrydag in Edenvale in hegtenis geneem vir die besit van perlemoen ter waarde van R1,5 miljoen, het die Gautengse polisie gesê.

Lt-kol Katlego Mogale het gesê die polisie was op patrollie toe hulle 'n motor, wat deur 'n Chinese burger bestuur is, van die pad getrek het.

"Terwyl ons hom oor sy vrag uitgevra het het hy baie senuagtig begin raak. Dit is toe dat ons die voertuig deursoek en gedroogde perlemoen agter op die bakkie gevind het," het hy gesê.

Terwyl 'n beampte besig was om hom in hegtenis te neem het die verdagte se vriend opgedaag en met die polisieman begin praat.

"Die vriend, ook 'n Chinese burger, het die beampte R10 000 aangebied om die hele saak te laat verdwyn."

Die tweede man is toe ook in hegtenis geneem en die polisie het R30 000 kontant in sy besit gevind.

"Albei verdagtes sal Maandag in die landdroshof in Kempton Park verskyn," het Mogale gesê.

Volg Nuus24 op Twitter.

- SAPA