Tutu verwerp Nobelvredesprys vir EU
2012-11-30 09:09
Stockholm – Emeritus-aartsbiskop dr. Desmond Tutu en twee ander Nobelvredespryswenners het aan die Nobel-stigting geskryf uit protes teen 'n besluit om vanjaar se Vredesprys aan die Europese Unie toe te ken.
"Die EU is duidelik nie die kampioen van vrede wat Albert Nobel in gedagte gehad het toe hy sy testament geskryf het nie," het hulle in 'n ope brief gesê.
Die brief is ook onderteken deur Noord-Ierland se Mairead Maguire, wat die prys in 1976 gewen het, en Argentinië se Adolfo Perez Esquivel, wat in 1980 met die toekenning vereer is.
"Die Noorweegse nobelkomitee het die prys op so 'n manier herdefinieer en aangepas op 'n manier wat nie konsekwent is met die wet nie," het hulle gesê en bygevoeg dat die komitee die oorspronklike wense van die Nobelprys-stigter wat in 1896 dood is, te respekteer.
Die drie vra ook dat die prysgeld van $1,2 miljoen (sowat R10 miljoen) nie aan die Europese Unie betaal word nie.
Altesaam 18 Europese leiers het 'n uitnodiging aanvaar om volgende maand se seremonie by te woon, terwyl ses die uitnodiging van hand gewys het, het die Karolinska-instituut, wat die Nobelprys toeken, gesê.
Die Britse premier, David Cameron, is een van die leiers wat gesê het hy gaan nie die geleentheid op 10 Desember in Oslo bywoon nie, terwyl die Duitse bondskanselier, dr. Angela Merkel, en die Franse president, Francois Hollande, gesê het hulle sal die geleentheid bywoon.
– Volg Nuus24 op Twitter
- SAPA
