Tutu: 'Wêreld sal meer vreedsaam wees as vroue regeer'
2011-10-08 15:15
Kaapstad – Die wêreld sal ‘n vreedsame plek wees as dit deur vroue beheer word, het emeritus-aartsbiskop Desmond Tutu Saterdag gesê.
Die Dalai Lama het hom in ‘n video-gesprek gevra hoe hy glo daar ‘n einde aan oorlog gebring kan word.
“Dit is eintlik baie maklik: laat vroue oorneem,” het Tutu geantwoord.
Hy het gesê vroue is van nature baie meer geneig om medelye te hê, terwyl mans geneig is om te voel hulle moet “macho” wees.
Tutu, wat sy 80ste verjaardag vier, het verder gegaan deur te sê as die Nazi-diktator Adolf Hitler meer liefde van sy ma ontvang het, sou die geskiedenis dalk anders gewees het.
“Hitler was nie deur sy ma vertroetel nie. Hy het nie ‘n gevoel van sekuriteit gekry nie... omdat hy leeg gevoel het, soos boelies baie keer voel, het hy probeer om bevestiging te kry deur lelik met ander te wees.”
Tutu en die Dalai Lama moes ‘n langafstand-gesprek voer nadat die Suid-Afrikaanse regering nie die Tibettaanse spirituele leier betyds met ‘n visum voorsien het nie.
– Volg Nuus24 op Twitter
- SAPA