Tutu: Regering het struggle verraai

2011-10-05 12:30

Amy Johnson

Kaapstad – Emeritus-aartsbiskop dr. Desmond Tutu het Woensdag gesê hy het as 'n baie hartseer ou man gepraat toe hy Dinsdag teenoor die regering uitgevaar het.

"Die Dalai Lama is een van die heiligste mense, 'n vryheidsvegter en dryfveer vir verandering. Dit is onregverdig," het Tutu in 'n onderhoud met Redi Tlhabi van TalkRadio 702 gesê.

"Hy is 'n wêreldfiguur en vir die regering om so rond te speel is iets wat niemand kan regverdig nie."

Tutu het gesê die regering se besluit oor sy visum het niks te doen met wat die Tibettaanse geestelike leier in die land kom doen nie.

"Dit het alles te doen met die land se verhouding met China. China is die grootste onderdrukker van sy mense. Ons (Suid-Afrika) is bang om nee te sê. "

Hy het gesê hy is gewalg deur die ANC en die regering.

"Ons het ons struggle verraai. Die mense wat betrokke was in die struggle, moet in hul graf omdraai."

Tokyo Sexwale, minister van menslike nedersettings, het ook in 'n onderhoud met Tlhabi gesê is dit is "ongelukkig" dat die situasie so hanteer is.

"China is ons vennoot. Ek is nie teen die Dalai Lama nie. Ons weet daar is probleme tussen China en Tibet en ons moet 'n buitelandse beleid handhaaf en ons eie waardes verdedig. Ek wil ook weet wat gebeur het en hoekom die kwessie op die manier hanteer is."

– Volg Nuus24 op Twitter

- Nuus24