Tutu: 'Klimaatsverandering bedreig ons tuiste'
2011-11-27 21:54
Durban – Aartsbiskop Desmond Tutu het klimaatsverandering ‘n “vyand” genoem wat die mens se gemeenskaplike tuiste bedreig.
Tutu het op die vooraand van 'n 12 dae lang beraad oor klimaatsverandering in Durban by ‘n godsdienstige saamtrek gesê die mens moet saamstaan om sy koolstofvoetspoor uit te vee.
“Ons kom nou teen ‘n groot vyand te staan – klimaatsverandering,” het hy gesê. “Ons het net een tuiste, maak nie saak of jy ryk of arm is nie.”
“Dit is ons enigste tuiste en julle is lede van een familie – die mensdom.”
Die godsdienstige saamtrek by Durban se King’s Park-stadion was propvol musiekitems en toesprake met klimaatsverandering as tema.
Die VN se Konferensie van Belanghebbendes van die Raamwerk-konvensie oor Klimaatsverandering (UNFCCC) skop Maandag in Durban af.
– Volg Nuus24 op Twitter.
- AFP