Tukkie-student se verkragter ontsnap
2011-10-29 08:04
Die man wat glo ’n student aan die Universiteit van Pretoria verkrag en verskeie kere met ’n mes gesteek het ná Bybelstudie by haar huis, het ontsnap.
Lt.kol. Lungelo Dlamini, Gautengse polisiewoordvoerder, het gesê die man is baie gevaarlik. Buiten vir die verkragting en roof van die Tukkie-student (22) is daar ook drie lasbriewe uit vir sy inhegtenisneming weens verkragting.
Hy is Woensdagaand in hegtenis geneem ná die voorval in ’n veiligheidskompleks in Magalieskruin in die noorde van Pretoria.
Hy is in die selle van die Pretoria-Noord-polisiekantoor aangehou.
Dlamini het gesê die man (24) het gistermiddag omstreeks 14:00 uit die George Mukhari-hospitaal in Ga-Rankuwa, noord van Pretoria, deur ’n toiletvenster ontglip.
“Die verdagte het gekla dat hy siek voel en is hospitaal toe geneem,” het Dlamini gesê. By die hospitaal het hy gevra om toilet toe te gaan, waarna hy ontsnap het. ’n Interne ondersoek sal gedoen word om te bepaal hoekom die verdagte alleen gelaat is. Hy is gevaarlik,” het Dlamini gesê.
Die student het Woensdagaand Bybelstudie by haar huis gehad. Sy het saam met mense hek toe geloop om dit vir hulle oop te maak. Toe sy terug in die huis kom, is sy oorval. Sy is verskeie kere met ’n mes in die gesig, op die arms en bene gesteek.
Ná die aanval het sy haarself na die tuinhekkie gesleep waar ’n ander inwoner wat weens tandpyn nie kon slaap nie, haar gekry en hospitaal toe geneem het.
– Volg Nuus24 op Twitter.
- Beeld