Tuinwerker vas wat glo vrou aanval
2010-07-13 08:03
Bloemfontein - Die tuinwerker wat na bewering ’n jong vrou in haar ouerhuis in Heuwelsig, Bloemfontein, met ’n tuinvurk aangeval het, is ná meer as ’n maand eindelik deur die Valke vasgetrek.
Thabiso Michael Phetlha (27) het Maandag vlugtig in die Bloemfontein-landdroshof verskyn nadat hy Donderdag in Tsakane naby Springs in Gauteng in hegtenis geneem is.
Sers. Mmako Mophiring, woordvoerder van die Valke, sê dit kom nadat hulle inligting opgevolg het.
Phetlha het na bewering op 4 Junie Karien van Rheede van Oudtshoorn (21) aangeval en met ’n tuinvurk in die nek gesteek.
Hy het na bewering ook gedreig om haar te verkrag en vermoor en ’n selfoon en geld gebuit.
Phetlha moet weer op 19 Julie in die hof te verskyn en bly in aanhouding.
Volksblad het vroeër met Van Rheede van Oudtshoorn gesels.
Phetlha het glo drie jaar tuinwerk by haar ouerhuis gedoen. Hy het na bewering verdwyn nadat hy gekonfronteer is oor geld, maar op die dag van die aanval om werk kom smeek.
Nadat sy later die agterdeur vir hom oopgemaak het, het hy na bewering die huis met ’n tuinvurk binnegestorm.
“Hy het geld en skootrekenaars gevra. Later het hy Amerikaanse dollars gesoek. Ek het vir hom gesê ek het niks in die huis nie.”
Phetlha het haar na bewering by die trap opgelei na haar pa se studeerkamer, waar hy in die laaie rondgekrap en op ’n paar rand afgekom het.
“Hy het weer op geld, skootrekenaars en vuurwapens aangedring.”
Van Rheede van Oudtshoorn sê sy het hom gesmeek en gesê daar is nie geld nie.
“Dis toe dat hy sê hy gaan my in elk geval verkrag en vermoor. Hy het my regoor my lyf betas, maar gelukkig nooit my klere uitgetrek nie. Toe steek hy my in my nek.”
Sy sê die werker het weer gemik om haar met die tuinvurk te steek, maar sy het haar teëgesit.
“Ek het losgekom, by die voordeur uitgehardloop en bo-oor ’n muur van 1,8m gespring. Hoe ek dit reggekry het, weet ek nie.”
Volgens Van Rheede van Oudtshoorn was die eerste motor wat sy gestop het, iemand wat sy geken het.
“Sy het my na die polisiekantoor gebring.”
- Volksblad