Tuinier dreig werkgewer met die dood
2011-07-19 07:10
Bloemfontein - ’n Onderwyseres van die Hoër Meisieskool Oranje in Bloemfontein het ’n dringende voorlopige bevel in die Vrystaatse hooggeregshof teen haar tuinier gekry nadat hy haar en haar huishulp met die dood gedreig het.
Oupakie George Majafa van Bloemside wat al die afgelope tien jaar by Wilmie en Hans Vosloo in Kestellstraat, Waverley, tuinwerk gedoen het, is deur die voorlopige bevel van regter Corné van Zyl verbied om mev. Vosloo met fisieke geweld of of liggaamlike leed te dreig.
Hy word ook verbied om in hul erf te kom, of binne ’n radius van 500 m daarvan sonder mev. Vosloo se toestemming. Hy mag ook nie met haar kontak maak nie, behalwe deur haar prokureur.
Dié tussentydse bevele tree dadelik van krag nadat dit op hom persoonlik beteken is.
Mev. Vosloo sê in ’n hofverklaring hoewel Majafa gereeld onder die invloed van drank by die werk opgedaag het, was sy werk deurgaans bevredigend.
Hy het soms met kneus- en snywonde wat hy in bakleierye in tavernes opgedoen het by die werk opgedaag. Sy het hom dan op haar koste vir mediese behandeling gestuur.
Einde Januarie vanjaar het hy egter só besope by die werk opgedaag dat sy hom huis toe gestuur het. Sy en haar man het hom ’n finale waarskuwing gegee.
Hy was skynbaar baie ontevrede oor dié aanmaning en het die huishulp, Emily Jolinga, kwalik geneem en haar beskuldig dat sy teen hom kant kies.
Hy het haar glo ook gedreig dat hy haar met ’n tuinvurk sou doodmaak en in die gesin se vrieskas sou sit.
Vosloo sê daarom het hulle vir Majafa op betaalde verlof gesit terwyl sy en haar man van 21 Junie af in die buiteland was.
Op die Sondagoggend van 26 Junie het Majafa gebel en het hy sy weeklikse betaling gesoek. Sy het aan hom gesê hy weet mos hy kry dit Maandae in sy bankrekening.
Hy het aggressief oor die telefoon geraak en gesê: “Jy weet ek sal kom en jou doodmaak.”
Vosloo sê sy neem dié dreigement baie ernstig op. Majafa tree weens sy drankgebruik baie onstabiel op.
Haar man, wat vroeër as sy terug in die stad was, het Majafa op 11 Julie skriftelik ontslaan. Hy is ook ’n skeidingspakket van drie maande se salaris aangebied.
Sy was op 13 Julie eers weer terug in die stad. Weens die dreigement voel sy haar veiligheid word bedreig.
Sy sê omdat Kestellstraat ’n doodloopstraat is, het Majafa geen nodigheid om binne 500 meter van hul huis te wees nie.
Adv. Piet Greyling, in opdrag van Deon Honiball van Matsepes-prokureurs, het die aansoek voor regter Van Zyl geargumenteer. Die keerdatum is 4 Augustus.
- Volksblad