Tshwane sê rekeninge is nié ’n groot probleem
2012-02-09 09:01
Pretoria – Inwoners wat aanmanings kry oor wanbetaling en dienste wat verkeerdelik opgeskort word, is ’n geringe probleem, sê die Tshwane-metro.
Beeld het Woensdag berig daar is groot ongelukkigheid onder inwoners in Tshwane wat kennisgewings kry dat hul dienste opgeskort gaan word weens wanbetaling, al betaal hulle pligs- getrou.
Tshwane kon verlede maand nie betyds rekeninge aan sowat 180 000 inwoners stuur nie weens ’n tekort aan koeverte.
Inwoners is versoek om betalings op grond van gemiddelde maandelikse verbruik te doen.
Baie inwoners het ook in Desember nie rekeninge gekry nie.
Van die inwoners kry nou aanmanings oor agterstallige rekeninge.
Jason Ngobeni, stadsbestuurder van Tshwane, het Woensdag gesê dit blyk daar is “onbestendigheid” met sommige inwoners se rekeninge.
Hy het gesê Tshwane probeer dienste wat verkeerdelik afgesny is binne 24 uur en selfs gouer herstel.
Ngobeni het gesê dit is nie ’n grootskaalse probleem nie.
Hy het gesê Tshwane het gesukkel om die rekeningstelsels van die vorige Metsweding-rade (Kungwini en Nokeng tsa Taemane), wat in 2011 ná die munisipale verkiesing by Tshwane ingelyf is, geïntegreer te kry.
Sowat 25 000 inwoners van die voormalige Kungwini en No-keng se inligting het verlore geraak in die oorskakeling, maar Tshwane sê die syfer het sedertdien gedaal en sowat 2 000 rekeninghouers se inligting moet nog bekom word.
Sommige inwoners moes die laaste paar maande van ver buite Bronkhorstspruit ry om by die munisipale kantoor in dié dorp te gaan hoor wat hul skuld beloop.
Elzabé Gagiano, ’n Pretoriase verbruikersaktivis wat inwoners help met rekeningprobleme, het gesê daar was die laaste ruk ’n duidelike styging in die getal inwoners wie se dienste verkeerdelik opgeskort word.
Die metro het inwoners wat nie hul rekeninge ook per e-pos of SMS kry nie, gevra om dié besonderhede aan hulle te gee.
– Volg Nuus24 op Twitter
- Beeld