Tshwane ontvang 755 087 klagtes
2010-10-01 06:40
Pretoria - Die Tshwane-metromunisipaliteit ontvang maandeliks ongeveer 63 000 klagtes van inwoners en al hoe meer is boonop aan die kla.
Die munisipaliteit se voorlopige jaarlikse prestasieverslag vir 2009-’10 het gister voor die metroraad gedien.
Dit toon Tshwane se inbelsentrums het in dié boekjaar ’n aansienlike styging in die aantal klagtes ervaar en moes 755 087 oproepe van inwoners met griewe beantwoord. Dit is ’n toename van 47,3%.
Volgens die verslag is die vaslegging van inwoners se klagtes ook “steeds ’n kwessie”.
Verskeie departemente het nie die doelwitte bereik wat vooraf gestel is nie.
Die DA het gesê die verslag staaf die feit dat die ANC die munisipaliteit nie doeltreffend kan bestuur nie.
Gert Pretorius, DA-leier, het verwys na ’n projek wat die voorsiening van ’n rioolnetwerk behels. “Die aanvanklike doelwit was 19,5 km. Die aangepaste begroting het dit tot 8,6 km laat krimp, maar net 1,1 km is uiteindelik voltooi.
“Die laat aanstelling van kontrakteurs, probleme met aankope en die feit dat geen terugvoer etlike maande lank ontvang is nie, word as redes aangevoer. Bid jou dít aan!”
Volgens Pretorius het die tyd aangebreek dat die ANC erken hy kan nie sukses in Tshwane behaal nie.
Luidens die verslag is ’n agterstand in die voorraadkettingstelsel, die aangepaste begroting, voorkeur wat aan WB 2010-projekte gegee is en swak diens wat sommige kontrakteurs gelewer het die vernaamste redes vir die tekortkominge wat in die verslag vervat is.
Terrance Mashego, ANC-hoofsweep in die raad, het in reaksie op die DA se kritiek gesê die ANC aanvaar alles is nie 100% nie. “Dit is hoekom die verslag voor die raad dien. Dit wat daarin staan, is die werklikheid en ons moet mekaar help om dit te pak. As dié skip sink, sink ons almal saam.”
Derek Fleming, DA-hoofsweep, het gesê hy is verheug dat Mashego “die ANC se mislukkings” erken.
Dr. Gwen Ramokgopa, uitvoerende burgemeester, het gesê munisipaliteite het wêreldwyd soortgelyke uitdagings.
“Jy gaan dit kry in Londen, China en selfs in Kaapstad, waar die munisipaliteit nie eens toilette behoorlik kan voorsien nie.”
- Beeld