Tronkstraf aanbeveel vir Hewana oor Yengeni-saak
2010-02-09 11:06
Maygene de Wee
Kaapstad - Siphiwe Hewana, gewese stasiebevelvoerder van die Goodwood-polisiekantoor, het presies die teenoorgestelde gedoen van wat in die polisie se visie, missie en waardes staan.
Só het dir. Johan Brand, provinsiale hoof van die Wes-Kaapse speurdienste, gister in die Parow-streekhof getuig in die saak waarin Hewana verlede jaar skuldig bevind is op aanklag van poging tot regsverydeling.
Die saak teen Hewana spruit uit sy inmenging met getuies in die dronkbestuursaak teen Tony Yengeni, gewese ANC-hoofsweep. Brand, sowel as komm. Thulani Ntobela, tans polisiehoof in Mpumalanga, het getuig gevangenisstraf is die enigste opsie wat vir Hewana oorweeg moet word.
Ntobela, wat tot verlede jaar ’n assistentkommissaris in die Wes-Kaap was en die ondersoek teen Hewana gelei het, het getuig hy is ten tyde van Hewana se verhoor verneder elke keer wanneer hy in die getuiebank gestaan het. “Ek is telkens deur die verdediging daarvan beskuldig dat ek leuens vertel, terwyl ek geweet het dié aantygings is onwaar.”
Hy het getuig Hewana se optrede het die beeld van die polisie benadeel en dat daar te veel korrupsie in die polisie is. “Dit (die korrupsie) moet uitgeroei word.”
Brand het gesê gevangenisstraf sal ’n sterk boodskap vir ander polisiebeamptes uitstuur. Hy het gesê hy gaan die polisie se visie, missie en waardes in die hof voorlees omdat Hewana se optrede nie in ooreenstemming daarmee was nie. “Hy moes as stasiebevelvoerder ’n voorbeeld vir ander stel.”
Sizwe Ndzungu, ’n korrektiewe beampte van die departement korrektiewe dienste, het in sy verslag gesê Hewana is geskik vir korrektiewe toesig.
“Ek het sy persoonlike omstandighede en verlede in ag geneem.” Hy het ook in sy verslag geskryf dat Hewana nog steeds ontken dat hy ’n misdryf gepleeg het.
’n Verslag deur ’n proefbeampte moet nog by die hof ingedien word.
Die saak is tot 23 Maart uitgestel vir die proefbeampte se verslag. Hewana sal daarna gevonnis word.
- Die Burger