Troetelhonde nie vir swartes – Zuma
2012-12-27 09:40
Durban – Om geld te spandeer om 'n hond te koop en om dié hond na die veearts en op uitstappies te neem, hoort in die wit kultuur, het pres. Jacob Zuma gesê.
Zuma het Woensdag in 'n toespraak in KwaZulu-Natal gesê dít is nie wat Afrikane moet doen nie en dat hulle eerder op die familie moet fokus.
Daar is 'n nuwe generasie van jong Afrikane wat probeer ander leefstyle aan te neem en selfs probeer om soos ander te lyk, het hy gesê.
"Al gebruik jy enige room en maak jy jou hare reguit, sal jy nooit wit wees nie," het Zuma gesê.
Zuma het verder gesê 'n persoon wat waardigheid en ubuntu verloor, sal waarskynlik respek en liefde vir sy medemens verloor. Hy het gesê swart mense moet ophou om die gewoontes van ander kulture aan te leer.
Hy het mense, wat honde meer as mense liefhet, beskryf as mense wat 'n "gebrek aan menslikheid het".
Terwyl hy die toespraak gelewer het, het duisende mense gelag en hom toegejuig.
Dit was Zuma se eerste openbare verskyning sedert hy verlede week in Mangaung tot 'n tweede termyn verkies is.
– Lees meer hier
– Volg Nuus24 op Twitter
