'Troep, bring toiletpapier of knyp...'
2011-04-08 07:03
Pretoria - Die nood by die Waterkloof-lugmagbasis druk glo deesdae só erg dat soldate nou hul eie toiletpapier moet saambring werk toe.
Ontstoke lede van die basis vertel hulle is ingelig dat die geld vir ’n nuwe besending toiletpapier nog nie vir die nuwe boekjaar beskikbaar is nie.
Die einde van die vorige boekjaar was einde Maart. Tot verdere kennisgewing moet elkeen dus vir homself sorg, is aan die soldate gesê.
Navrae by die lugmag het gister geen reaksie ontlok nie. ’n Ingeligte het egter verduidelik dat die krisis eerder weens die swak beplanning en begrotingsbestuur in sekere eenhede op die basis teweeggebring is.
Daar is ’n gróót stoor vol toiletpapier op die basis en die kwartiermeester is in beheer daarvan.
Ingevolge die jongste begrotingsbestuurstelsel moet elke direktoraat begroot vir sy hoeveelheid papier per jaar.
Die probleem is dat sommige afdelings “vergeet” het om vir toiletpapier en ander items te begroot en nou is hulle in die moeilikheid.
Dieselfde ingeligte het gesê die probleem met die papier word tienvuldig vererger omdat dit deesdae as “wit goud” in die weermag beskryf word.
Die papier word in sulke enorme hoeveelhede gesteel dat die kartonrolletjie wat oorbly as die papier opgebruik is ingeruil moet word vir ’n vol rol.
Die lugmag het nie op skriftelike navrae gereageer nie.
Volg Nuus24 op Twitter
- Beeld