Trevor klap sweep oor korrupsie
2011-04-18 07:06
Hopetown - Terwyl verkiesingskoors in die Noord-Kaap styg, het Trevor Manuel, hoof van die nasionale beplanningskomitee, Sondag hier op ’n byeenkoms die sweep geklap teen korrupte staatsamptenare.
In nog ’n verkiesingsveldtog in die Noord-Kaap het ook Mosiuoa Lekota, leier van Cope, die naweek op Strydenburg, Petrusville en De Aar skerp kritiek teen die ANC oor korrupsie in munisipaliteite uitgespreek.
Oud-pres. Nelson Mandela se belofte van ’n beter lewe vir almal het onder die ANC en sy provinsiale voorsitter, John Block, ontaard in ’n beter lewe vir sommiges, het Lekota gesê.
Manuel het voor ’n skare van meer as ’n duisend mense in die Sunnyboy Jantjies-stadion op Hopetown gesê korrupsie moet uitgeroei word. Almal moet dit teenstaan, raadslede inkluis. Raadslede en wykskomitees moet aanspreeklik gehou word, het hy gesê.
Die ANC-byeenkoms is gehou op Hopetown, waar die opposisieparty Cope sterk staan en waar die ANC Sondag ’n groot indruk op kiesers wou maak.
Die premier, Hazel Jenkins, lede van die Noord-Kaapse wetgewer en ANC-ringkoppe, onder wie Naledi Pandor, Jessie Duarte, Duma Ndleleni, Collins Chabane en Playfair Morule was op die verhoog om kiesers te oorreed om hul kruisies langs die logo met groen, goud en swart te trek.
“Copetown moet weer Hopetown word,” het een van die ANC-sprekers gesê.
Manuel het baie klem op samewerking gelê. “Saam sal ons meer bereik. Ons moet vir die gemeenskap stem en nie vir eie belang nie. Ons as amptenare is die diensknegte van die gemeenskap. Kandidate moet pligsgetrou en dienend wees. Die raadslede moet namens ons na water, krag en sanitasie omsien.
“Ek wil ook nie meer hê dat raadslede so geheimsinnig moet wees oor hul doen en late nie. Hulle moet elke vier maande verslag aan die hele gemeenskap doen oor werk wat gedoen is, al dan nie.”
Manuel, en later ook Mathews Phosa, die ANC se tesourier-generaal, het verwys na die Ficksburg-voorval waarin Andries Tatane dood is. Albei het dit ’n jammerlike en betreurenswaardig voorval genoem. Die polisie moet mense beskerm, het Manuel gesê.
“Een van ons verkiesingsboodskappe is dat mense veilig in die teenwoordigheid van die polisie moet voel. Ons het almal die demokratiese reg om met mekaar te verskil.”
Phosa het op sy beurt gesê inwoners kan slegs vir die ANC stem, omdat dié party se lede vir byna 100 jaar gely en opgeoffer het. Geen ander party kan dit sê nie.
“Ons gaan verseker dat julle almal ’n beter lewe geniet, veral in die Noord-Kaap waar daar so baie myne is. Die myne moet deelneem en meer werk skep.
“Ons het ook met boere gepraat en almal wil met werkers saamwerk en hulle oplei. Ons wil ook baie swart boere hê, net soos ons baie wit boere het.
Oor onderwys het hy gesê: “Verwoerd kan in sy graf omdraai. Swart kinders kan ook wetenskap en wiskunde leer. Ons wil verseker dat ons kinders by die skool kry om ’n goeie opvoeding te kry.
“In die arm woonbuurte gaan ons verseker dat daar water, krag en oorhoofse ligte is om veiligheid te verbeter,” het Phosa afgesluit.
Die toeskouers is met musiek en dansers vermaak en daar was verskeie toesprake van die koalisiepartye, die ANC-jeugliga en die ANC-vroueliga.
Cope het Sondag in reaksie gesê die ANC het so ’n groot vertoning in die streek gehou omdat die party bang is vir die opposisieparty.
“Ons het in die provinsiale verkiesing in 2009 die ANC se steun met 20% laat daal. Ons het nog net 2% nodig om hier te regeer.”
- Volksblad