Treinongeluk: Minister besoek toneel
2013-01-31 13:25
Pretoria – Dikobe Ben Martins, minister van vervoer, het Donderdag die ongelukstoneel naby die Kalafong-stasie in Pretoria waar twee treine in 'n ongeluk betrokke was, besoek.
Hy en 'n gevolg, insluitend provinsiale vervoerbeamptes, het op die treinspoor na die wrakke van die twee treine gestap.
Die polisie op die toneel het gesê een van die treine het ten tyde van die ongeluk op die spoorlyn tussen Cor Delfos en Saulsville stilgestaan, waarna 'n ander trein daarteen gebots het. Die ongeluk het omstreeks 07:00 begin.
Nooddienswerkers was teen 10:00 steeds op die toneel.
Die drywer is omstreeks 09:00 per helikopter in 'n kritieke toestand na die hospitaal geneem, het Johan Pieterse, woordvoerder van die nooddienste, gesê.
Pieterse het gesê 20 mense het ernstige beserings opgedoen in die ongeluk. Altesaam 150 ander mense het geringe beserings opgedoen.
Verskeie joernaliste en paramedici was op die toneel.
'n Mediakonferensie oor die oorsaak van die ongeluk sal later in die dag by die Kalafong-stasie gehou word, het Lillian Mofokeng, woordvoerder van Metrorail, gesê.
– Volg Nuus24 op Twitter
- SAPA
