Treindrywer steeds in hospitaal ná ongeluk
2013-02-04 12:48
Johannesburg – Die drywer wat verlede week met sy trein teen 'n stilstaande trein in Atteridgeville gebots het, is een van vier mense wat nog in die hospitaal behandel word, berig Eyewitness News.
Gert Kotzé het kritieke beserings opgedoen in verlede Donderdag se ongeluk, waarin sowat 300 mense beseer is.
Mosenngwa Mofi, uitvoerende hoof van die Passasierspooragentskap van Suid-Afrika (Prasa), het vroeër gesê kabeldiefstal het die ongeluk veroorsaak, het Beeld berig.
Die kragtoevoer na die sinjale is as gevolg daarvan onderbreek.
Volgens Mofi moes ’n stelsel gebruik word wat op mense staatmaak.
Metrorail het ook bewerings ontken dat die treindrywer, wat al 36 jaar lank vir die maatskappy werk, verantwoordelik is vir die ongeluk.
Lillian Mofokeng, woordvoerder van Metrorail, het gesê Kotzé se toestand het verbeter.
"Dit gaan goed met hom. Hy is nie meer in 'n kritieke toestand nie en hy ontvang die nodige mediese sorg by die Milpark-hospitaal."
– Lees meer hier
– Volg Nuus24 op Twitter
