Trein tref motor, bestuurder vermis
2009-10-10 20:01
Johannesburg- In ‘n vreemde sameloop van gebeure is die bestuurder van ‘n Alpha Romeo vermis nadat ‘n trein die motor getref het.
Die polisie is opsoek na die bestuurder van die motor nadat ‘n trein Saterdagoggend naby Meyerton daarin vasgery het.
“Volgens die treindrywer het hy drie mans langs die pad sien staan wat hom gewaarsku het dat ‘n motor op die treinspoor is. Hy het die geel motor gesien maar kon nie betyds stop nie,” het Werner Vermaak, ER24-woordvoerder, gesê.
Met paramedici se aankoms op die toneel het hulle die ergste vermoed, maar by nader inspeksie het dit geblyk dat niemand in die motor was nie.
“Daar was geen teken dat enigiemand in die motor was toe die trein dit getref het nie,” het Vermaak gesê.
Die hulp van die polisie se honde-eenheid is ingeroep om na die insittende te soek, maar dit het geen resultate opgelewer nie.
“Die identiteitsboekie van ‘n 38-jarige vrou is in die motor gevind asook ‘n handsak.”
Die vermoede bestaan dat die vrou se motor moontlik gekaap is en dat die voertuig gesteel is. Die saak word steeds deur die polisie ondersoek.
–Sapa