Trein ry twee dood
2010-04-09 15:01
Johannesburg – Twee mans is dood nadat hulle Vrydagoggend deur ’n trein by New Canada-stasie raakgery is, het paramedici in Johannesburg gesê.
Volgens Percy Morokane, woordvoerder, het die mans (onderskeidelik 30 en 40 jaar oud) die treinspoor probeer oorsteek toe hulle raakgery is.
Die trein was vanaf Soweto na Johannesburg se middestad onderweg.
“Met paramedici se aankoms op die toneel was die mans ernstig beseer maar steeds by hulle volle bewussyn. Nooddienswerkers het onverpoos gewerk om die mans se lewens te red, maar kon egter nie daarin slaag nie. Beide mans het gesterf weens die ernstige aard van hulle beserings,” het Morokane gesê.
“Daar was al soortgelyke voorvalle in die verlede. Daar is spesifieke areas waar voetgangers die treinspoor veilig kan oorsteek.”
- Sapa