Tref-en-trap-motoris wag op vonnis
2011-07-06 20:57
Kaapstad – Andries Zuiderma, wat ses jaar gelede ‘n fietsryer met sy motor doodgery het, sal op 28 Julie in die Wynberg-streekhof hoor wat sy vonnis is.
Zuiderma het in Maart 2006 met sy dubbelkajuit-bakkie in ‘n groep fietsryers ingeploeg en weggery.
Een van die fietsryers, Jan-Hendrik Olivier (39) van Johannesburg, was saam met sy gesin in Kaapstad vir die Cape Argus-fietstoer. Hy is dood in dié ongeluk.
Zuiderma, wat Woensdag in die hof verskyn het, is skuldig bevind op aanklagte van strafbare manslag en die versuiming om ná 'n ongeluk te stop en bystand aan beseerde mense te verleen.
Bantu Nyembezi, aanklaer, het gevra dat Zuiderma tronkstraf met vroeë vrylating opgelê word, waarna hy onder huisarres sal wees.
William Booth, vir die verdediging, het egter voorgestel dat huisarres sonder tronkstraf voldoende sal wees.
Nyembezi het gesê die vonnis moet motoriste herinner dat hulle in beheer van ‘n toestel is wat dood of ernstige beserings kan veroorsaak.
Hy het gesê die wet vereis dat motoriste omvattende besorgdheid toon wanneer hulle bestuur en dat swaar strawwe opgelê sal word vir dié wat iemand doodmaak deur nalatigheid.
Nyembezi het gesê Zuiderma se versuiming om by die ongelukstoneel te stop, is ‘n verswarende faktor.
Volgens Booth is Zuiderma ‘n persoon sonder kriminele tendense en nie iemand wat uit die samelewing verwyder hoef te word nie.
Dit is hoogs onwaarskynlik dat Zuiderma ooit weer met die gereg sal bots, het hy gesê.
Hy het gesê Zuiderman het hom gevra om namens hom sy medelye aan die familie van die oorledene uit te spreek.
“Ons kan nie die geskiedenis verander nie. Die feit dat hy ‘n ander persoon se dood veroorsaak het, sal vir die res van sy lewe by Zuiderma spook.”
Zuiderma sal ook ‘n kriminele rekord hê en dít sal ‘n ernstige impak op sy lewe hê, het Booth gesê. Volgens hom is die perke van huisarres net so erg soos gevangenisstraf.
- Volg Nuus24 op Twitter
- SAPA