'Tree nóú op, pres. Zuma'
2011-10-12 08:05
Kaapstad. – Athol Trollip, leier van die opposisie in die parlement, het Dinsdag ’n ope brief aan pres. Jacob Zuma gestuur oor die gebrek aan proaktiewe optrede tydens sy bewind.
Volgens Trollip is daar ’n groeiende kloof tussen die regering se beloftes en die regering se vermoë om sy beloftes gestand te doen.
Hy meen dis nou tyd vir aksie, soos met die onlangse aankondiging van ’n kommissie van ondersoek na die regering se wapentransaksie gedoen is, hoewel die begrensing van die kommissie se taak ook nou prioriteit moet geniet.
Volgens Trollip is daar verskeie hangende kwessies wat opgelos moet word en moet die president ’n paar taai keuses maak, al maak dit hom ongewild binne sy party.
Eerstens verwys Trollip na die peperduur huurooreenkomste vir polisiekantore, waaroor adv. Thuli Madonsela, openbare beskermer, bevind het Gwen Mahlangu-Nkabinde, minister van openbare werke, het onaanvaarbaar en onwettig opgetree, en dat dit neerkom op wangedrag.
In Februarie het Madonsela aanbeveel daar moet teen die minister opgetree word. Sedertdien het Mahlangu-Nkabinde reeds verskeie kere nie opgedaag wanneer sy gevra is om haar saak te stel voor die parlementêre portefeuljekomitee oor openbare werke nie.
“Dit is u prerogatief om op tree teen die minister en die nasionale polisiekommissaris, genl. Bheki Cele. U kan dadelik optree. En u behoort dit sonder verwyl te doen,” aldus Trollip.
Die tweede klippie in Trollip se skoen is die plan teen korrupsie, waarvoor ’n interministeriële taakspan twee jaar gelede aangestel is, maar waarvan dadels gekom het.
“Die noodwendige gevolgtrekking is dat daar geen plan teen korrupsie is nie. Die onuitwisbare indruk is nogmaals dat hierdie regering beter vaar met beloftes as met resultate.”
Die parlementêre DA-leier se derde punt handel oor die ministeriële handboek. Veranderings daarin word al twee en ’n half jaar lank beloof, sedert die astronomiese besteding op ampsmotors ’n openbare twisappel geword het. Trollip het uitgewys dat die Wes-Kaapse regering reeds die nodige veranderings aangebring het en jaarliks omvattend bespaar.
“U kan diegene stil maak wat beweer u presidentskap word bepaal deur die wil om ander tevrede te stel. Nou kan u aan alle Suid-Afrikaners toon dat u ’n ware leier is,” het Trollip beklemtoon.
– Volg Nuus24 op Twitter
- Beeld