Transnet dok R13 m. op vir WB
2010-08-03 20:10
Kaapstad - Ook Transnet het die sokker-soustrein flou gery.
Dié staatsonderneming het meer as R13,3 miljoen bestee aan kaartjies vir die Wêreldbeker-sokkertoernooi om sy grootste kliënte en strategiese vennote te bederf.
Barbara Hogan, minister van openbare ondernemings, het gister in antwoord op ’n parlementêre vraag van die DA gesê Transnet het in 2009 sowat R1,1 miljoen bestee aan kaartjies vir die Nedbank-uitdaaggholftoernooi by Sun City en R36 000 aan rugbykaartjies.
Nog 170 kaartjies ter waarde van sowat R360000 is in April vanjaar op kaartjies vir die Kaapstadse Internasionale Jazzfees uitgegee.
Bogenoemde uitgawes is aangegaan om “strategiese verhoudings” met belangegroepe en rolspelers te versterk, ’n positiewe beeld uit te bou en om “Transnet as ’n kliënt-gefokusde sake-entiteit in transformasie te posisioneer”, lui Hogan se motivering.
Eskom, die Suid-Afrikaanse Lugdiens (SAL) en Transnet het dus altesaam R48,6 miljoen se kaartjies vir die sokkertoernooi gekoop.
Hogan het ook bekend gemaak die staat se wapenvervaardiger, Denel, het in 2009 meer as R60000 bestee aan sokker- en rugbykaartjies wat aan personeel van die departemente van verdediging en militêre veterane; handel en nywerheid; internasionale betrekkinge en samewerking en die polisie uitgedeel is.
Volgens Hogan het Eskom verlede jaar tydens die Konfederasiebeker-sokkertoernooi R18500 aan kaartjies bestee om bande met belangrike kliënte en belanghebbendes te versterk.
Tim Harris, DA-LP en lid van die Nasionale Raad van Provinsies se gekose komitee oor finansies, het gister gesê Transnet, Denel, Eskom en die SAL is gewetenloos.
“Openbare geld word vermors om hoogs betaalde uitvoerende hoofde en vriende van die ANC-regering te vermaak terwyl Suid-Afrikaanse belastingbetalers se elektrisiteitsrekeninge reusagtig gestyg het.”
Pravin Gordhan, minister van finansies, die ouditeur-generaal en die parlement se staande komitee oor openbare rekeninge (Skoor) is veronderstel om eersdaags te vergader oor die geld wat staatsdepartemente en staatsondernemings aan Wêreldbeker-sokkerkaartjies bestee het.
Volgens Jabulani Sikhakhane, woordvoerder van die tesourie, moet ’n datum nog vasgestel word.
- Die Burger