Transito-rowers slaan toe naby Kaapse lughawe

2013-01-21 15:06

Kaapstad – Rowers het Maandagoggend probeer om 'n transitovoertuig naby die Kaapstadse Internasionale Lughawe te beroof, het die polisie in die Wes-Kaap gesê.

Kapt. Frederick van Wyk het gesê sekuriteitswagte het in die vroeë oggendure geld by die lughawe gaan oplaai en sekuriteitspersoneel van die lughawe het hulle tot op die N2 vergesel.

'n Wit Mercedes-Benz het toe die transito-voertuig agtervolg en by die R300-afrit daareen gebots, waarna die voertuig omgeslaan het.

"Die aanvallers het op die transito-voertuig begin skiet. Die sekuriteitspersoneel het teruggevuur en die aanvallers het te voet van die toneel gevlug en hul voertuig agtergelaat," het Van Wyk gesê.

Geen beserings is aangemeld nie en geen geld is uit die transito-voertuig gesteel nie.
     
– Volg Nuus24 op Twitter

- SAPA