Tradisionele geneser trou met meisie (13)

2013-01-31 14:33

Johannesburg – 'n Tradisionele geneser van Limpopo se huwelik met 'n tienermeisie het die regering in dié provinsie warm onder die kraag.

"Sulke praktyke kan nie ongesiens verbygaan in 'n land waar kinders beskerm word en die reg het op opvoeding en 'n stabiele en veilige omgewing nie," het Phumla Williams, woordvoerder van die regering, in 'n verklaring gesê.

The Sowetan het Donderdag berig dat 'n 57-jarige tradisionele geneser met 'n 13-jarige meisie getrou het. Die meisie het epilepsie, en die geneser voer aan hy het met haar getrou sodat hy haar probleme kan monitor. Die geneser hou vol die meisie se probleme word deur haar voorvaders veroorsaak.

Die meisie se ma het gesê die tradisionele geneser het haar dogter twee jaar lank behandel en haar epilepsie glo genees. Hy het toe aan die vrou gesê die voorvaders pla haar dogter en dat sy gemonitor moet word. Hy het aangebied om met haar te trou.

"Ons het geen ander keuse gehad as om in te stem nie, want ons wil hê sy moet gesond wees," het die vrou aan die koerant gesê.

Sy het R5 000 as lobola ontvang vir haar dogter.

Volgens die koerant is die tradisionele geneser op 23 Januarie in hegtenis geneem nadat 'n inwoner 'n klag by maatskaplike werkers ingedien het. Die aanklagte teen hom is later laat vaar omdat die meisie se ouers ingestem het dat sy met hom mag trou.

Williams het gesê hulle vertrou dat die saak die nodige aandag sal geniet.
       
– Volg Nuus24 op Twitter

- SAPA