Township-entrepreneurs in ANC se visier
2012-06-25 09:18
Kaapstad – ‘n Burgerregte-organisasie het ‘n voorstel van die ANC om die besit van township-spazawinkels deur buitelanders te beperk, veroordeel, is Maandag berig.
Brian Hanekom, koördineerder van die organisasie Passop, wat na die belange van buitelanders omsien, het aan die Cape Times gesê dié stap sal ‘n fout wees.
“Ons is baie teleurgesteld om dit te hoor. Ons hoop om met die ANC se provinsiale voorsitter [Marius Fransman] oor hierdie kwessie te praat.
“Ons weet nie hoeveel buitelandse entrepreneurs daar in die townships is nie, maar ons kan aanvaar dat die regte van mense wat nou goedkoper betaal vir ‘n brood meer gewig dra as die belange van plaaslike winkeleienaars.”
Songezo Mjongile, die ANC se provinsiale sekretaris, sê ingryping is nodig om die aantal plaaslike entrepreneurs in die townships te laat toeneem.
“Meer plaaslike inwoners moet deelneem en ondersteun word... dit skep spanning. As ons nie aandag skenk daaraan nie, word dit ‘n bron van skeiding.”
Hy het aan die koerant gesê dit is nie ‘n provinsiale voorstel nie, maar deel van ‘n nasionale gespreksdokument.
– Volg Nuus24 op Twitter
- SAPA
