Top-advokaat bedank uit balieraad
2010-03-26 10:29
Johannesburg - Die Pretoriase en Johannesburgse balieraad gaan voort met wangedrag-ondersoek teen adv. Seth Nthai, berig Business Day.
Nthai het Donderdag bedank te midde van bewerings dat hy in Januarie omkoopgeld van 'n Italiaanse mynmaatskappy gevra het om veranderings aan mynwette teen te staan.
Dié maatskappye was ten tyde van die voorval haaks met die regering oor mynwette.
Nthai het die staat in die Ginwala-ondersoek verteenwoordig.
Die advokaat het glo vir beleggers 'n skikking in ruil vir R5 miljoen aangebied. Hy is nie deur die regering beveel om te skik nie.
Hy het sy bedanking vroeg Donderdag ingedien.
Hy het nie enige van die bewerings teen hom erken nie, maar het in 'n mediaverklaring gesê hy het sonder sy kliënt se medewete met 'n verteenwoordiger van die Italiaanse maatskappye vergader.
Nthai het gesê hy aanvaar dat "dít die professionele etiekkode oortree".
Hy het toe geloop en die ondersoek het in sy afwesigheid voortgegaan.
– Sapa