Tolhekwerkers op N4 staak dalk
2010-03-29 06:37
Arisja Jacobs
Tolhekwerkers op die N4-snelweg in Mpumalanga wil vandag met ’n volskaalse staking begin.
Lede van die South African Transport and Allied Workers Union (Satawu) in die provinsie beplan ook om oormôre in groot getalle na die tolhek tussen Middelburg en Witbank op te ruk.
“Ons beplan nie om die hekke of paaie te versper nie, maar omdat simpatiseerders by ons kan aansluit, kan ons geen versekering gee dat motoriste nie ontwrig sal word nie,” het mnr. Vusi Ntshangase, provinsiale Satawu-sekretaris, gesê.
Die staking spruit uit die ineenstorting van loon-onderhandelings tussen Satawu en Trans African Concessions (Trac), wat die tolpad bedryf.
Die onderhandelings het al in Januarie begin.
Selfs die kommissie vir versoening, bemiddeling en arbitrasie (KVBA) kon nie ’n oplossing vir die geskil vind nie.
Volgens Ntshangase sal die staking onbepaald voortduur totdat ’n ooreenkoms tussen Trac en Satawu bereik word.
Die werkers eis onder meer ’n 17%-verhoging, vier maande kraamverlof, ’n maandelikse behuisingstoelae van R1 000 en dat Trac 65% tot die werkers se mediese fonds en voorsorgfonds bydra.
Volgens mnr. Arthur Coy, Trac se uitvoerende hoof, het sy maatskappy via Cosatu se webtuiste van die beplande staking gehoor.
“Ons het teen Vrydag nog geen formele kennisgewing ontvang nie. Trac het alles in sy vermoë gedoen om te verseker dat die staking nie die funksionering van die tolhekke beïnvloed nie.”
