Toeris sterk aan ná val in Transkei
2012-11-12 14:40
Johannesburg – ‘n Duitse toeris is besig om in ‘n hospitaal aan te sterk nadat hy die naweek 30 m van ‘n krans by Waterfall Bluff in die Transkei geval het.
Beeld berig Herribert Schropp (71) was onder ‘n groep toeriste wat ‘n grot by dié waterval in die Oos-Kaap besigtig het.
Volgens Nita Ross, woordvoerder van die Mbotyi Lodge waar die toergroep gebly het, het Schropp vermoedelik sy kop in die grot gestamp, gestruikel en by die krans afgeval.
“Die gids, Edgar Pogulis, het afgeklim en Schropp gestabiliseer. Nog ’n gids het die ander lede van die toergroep terug na die verblyfplek geneem,” het sy gesê.
Kapt. John Fobian, rampbestuurshoof van die polisie in die Oos-Kaap, het gesê ambulans- en soek- en reddingspanne uit Oos-Londen, Mthatha en Durban het aan die redding deelgeneem.
Reddingswerkers het sowat tien uur lank gespook om die man te bevry. Daarna is hy per helikopter na die St. Augustine-hospitaal geneem.
Volg Nuus24 op Twitter
- SAPA
