Toeris besteel: Man moet 12 jaar sit
2010-07-07 10:23
Beeld
Potchefstroom. – ’n Gewoontemisdadiger het Dinsdag hier in die spesiale WB 2010-hof aangevoer hy het ’n Spaanse sokkertoeris in die stad besteel omdat hy as motorwag geen inkomste meer in die “stil vakansieseisoen” kon verdien nie.
Landdros E. Mmoláwa het nie veel genade daarvoor gehad nie en Martin Palmer (21) van Promosa naby die stad tot 12 jaar direkte tronkstraf op aanklagte van huisbraak en diefstal gevonnis.
Mmoláwa het met verwysing na Palmer se vorige veroordelings, wat roof en poging tot moord insluit, gesê dis duidelik dat Palmer “gewelddadige” neigings het.
“Dis kommerwekkend dat jy op so ’n jong ouderdom sulke ernstige misdade pleeg. Dis nou tyd om jou te stop,” het Mmoláwa gesê. “Jy wil nie in vrede met die gemeenskap leef nie.”
Mmoláwa het gesê die soort misdaad waaraan Palmer hom skuldig gemaak het, is endemies in ons land en dat mense van die howe verwag om hulle teen mense soos Palmer te beskerm.
“Howe moet swaar strawwe daarvoor oplê, anders sal mense reg in eie hande neem. Hulle moet veilig en vreedsaam kan leef sonder vrees vir inbrake,” het Mmoláwa gesê.
Palmer het skuld beken. In sy pleitverduideliking wat in die hof voorgelees is, het hy gesê hy het op 25 Junie die ruit van José Gracia se kamer by die Oudrift-gastehuis buite die dorp gebreek terwyl Gracia nie daar was nie.
Hierna het hy in die kamer geklim en verskeie items gesteel, onder meer drie denimbroeke, twee jasse, 15 T-hemde, ’n paar Adidas-tennisskoene, twee sweetpakke, parfuum, vier Adidas-truie, kouse, sporthemde en slaapklere. Palmer het ook erken hy het ’n afstandbeheertoestel en DStv-dekodeerder gesteel wat aan die gastehuis behoort.
Dié twee items is later onder sy bed in sy huis in Promosa gevind. Van die klere is op ’n hoop by ’n treinspoor naby die gastehuis gevind, terwyl ander in Palmer se besit gevind is.
Mmoláwa het gesê hoewel die meeste van die gesteelde goedere met ’n gesamentlike waarde van R6 200 teruggevind is, was dit nie deur Palmer se toedoen nie.
Die polisie het hom met die toneel verbind nadat sy vingerafdrukke daar gevind is. Palmer was uit op parool weens twee aanklagte van roof waarop hy in Augustus 2007 skuldig bevind is, toe hy verlede maand by die gastehuis ingebreek het.
Hy is in Februarie 2007 ook skuldig bevind op ’n aanklag van poging tot moord, waarvoor hy vyf jaar tronkstraf opgelê is, maar dié vonnis is in sy geheel opgeskort. Hy was toe maar 17.
- Volg Nuus24 op Twitter.
- Beeld