'Toegewyde Christen' moet hoes oor affair

2013-01-31 09:50

Johannesburg – 'n Man wat 'n buite-egtelike verhouding gehad het met 'n ander man se vrou, moet R75 000 in skadevergoeding betaal aan die verontregte man, is Donderdag berig.

Waarnemende regter Louis Vorster het Renier Heine van Irene in Pretoria ook beveel om jaarliks 15,5% rente te betaal totdat die laaste betaling gemaak is, berig The Star.

Die klaer, wat as DJE Erasmus geïdentifiseer is, het 'n skadevergoedingseis ingedien nadat sy vrou, Sune Erasmus, hom in 2010 vir Heine gelos het.

Erasmus het aan die hof gesê hy het 'n gelukkige huwelik gehad tot sy vrou in 2009 by 'n farmaseutiese maatskappy begin werk en vir Heine ontmoet het.

Heine het getuig dat Sune ongelukkig was in haar huwelik voor sy hom ontmoet het. Al drie is glo toegewyde Christene.

Volgens die koerant het Vorster die "heiligheid van die huwelik" benadruk en gesê dit word deur die wet erken.
    
– Volg Nuus24 op Twitter

- SAPA