Tieners vas ná gru-moorde op broers, niggie
2012-11-16 08:21
Johannesburg – Ses tieners is Donderdag in hegtenis geneem nadat drie kinders in Augustus in Limpopo vermoor is, het die polisie gesê.
"Hulle word in 'n plek van veiligheid aangehou en sal Vrydag in die Mookgopong-landdroshof verskyn," het brig. Hangwani Mulaudzi gesê.
Mulaudzi het gesê die ses kinders tussen die ouderdom van 12 en 14 staan tereg op drie aanklagte van moord en een van verkragting.
Die broers, Bafana Kekana (9) en Hosea Richard Kekana (10), en hul niggie Johana Kekana (12) is op 18 Augustus in Mookgopong gestenig. Bloedbevlekte klippe, wat met 'n kombers en takke bedek is, is naby die lyke gevind.
Die vermoorde kinders was geklee in hul skooluniforms en hul hande en voete is met skoenveters vasgemaak.
Johana is verkrag voor sy vermoor is.
Die kinders is laas op 15 Augustus lewend gesien tydens 'n optog om meer onderwysers by hul skool, Dikobo-laerskool, te eis. Hulle het by die Montadi-jeugsorgsentrum gewoon.
Mulaudzi het gesê die ses tieners woon in die gebied waar die lyke gevind is.
Die Suid-Afrikaanse Menseregtekommissie (SAMRK) het in Oktober gesê hy ondersoek die moorde en die moontlikheid dat die kinders se voogde nalatig was.
– Volg Nuus24 op Twitter
- SAPA
