Tiener vas wat glo bejaarde verkrag

2012-12-02 08:18

Johannesburg – 'n Tienerseun is in hegtenis geneem in verband met die verkragting van 'n 70-jarige vrou, het die Oos-Kaapse polisie Sondag gesê.

Die bejaarde vrou het op 26 November van 'n tradisionele seremonie na haar huis in die Rwantsini- informele nedersetting teruggekeer toe sy deur die 17-jarige aangeval is, het kapt. Jackson Manatha gesê.

"Die verdagte het haar na bewering agtervolg en haar in 'n oop veld erg aangerand en verkrag," het Manatha gesê.

Die seun is die volgende dag in hegtenis geneem en staan tereg op aanklagte van aanranding en verkragting.

Manatha het gesê hy is later vrygelaat in die toesig van sy ouers, omdat hy steeds 'n minderjarige is.

Hy sal na verwagting Maandag in die Dutywa-landdroshof verskyn.

– Volg Nuus24 op Twitter.

- SAPA